Friday, August 8, 2025

පාට කණ්නාඩි කරන වින්නැහිය


පක්ෂපාතීත්වය පුද්ගලයාගෙන් පුද්ගලයාට වෙනස් වේ, සමහර අය දේශපාලනඥයින්ට හෝ පක්ෂවලට පක්ෂපාතී වන අතර අනෙක් අය රටට පක්ෂපාතී වෙති. 
 
සමහරුන්ට දේශපාලනය යනු සමාජ අවශ්‍යතාවයක් පමණි. 
 
නමුත් පිරිසකට එය ආගමක්. රටට පක්ෂපාතී මිනිසුන්ට වැදගත් වන්නේ ප්‍රතිපත්ති, ක්‍රියාමාර්ග, ප්‍රතිව්‍යුහගත කිරීම් මිස පුද්ගල පෞර්ෂයන් හෝ පක්ෂ නොවේ. 
මිනිසුන් තම විශ්වාසයන්, දැනුම සහ බුද්ධිය අනුව හැසිරේ. නූගත් සමාජශීලී නොවන මිනිසුන් මෙන්ම දැනුම ඇති උගත් මිනිසුන් අන්ධ භක්තීන් හා විශ්වාස තුල සැරි සරයි. එලෙසින්ම උගත් හා බුද්ධිමත් පුද්ගලයින් පවා විවිධ විශ්වාසයන් දරයි. එනමුත් මේ කුලක තුනක ප්‍රතිචාර හා ප්‍රතිඵල එකිනෙකට වෙනස් වේ. බොහෝ දෙනෙක් විවේචන වලට, තර්කානුකූල සත්‍ය පිලිගැනීමට හෝ විවිධ මතවලට කැමති නැත.
මේ කියන්න යන්නේ, වර්තනමාන ශ්‍රී ලාංකික දේශපාලනය මුල් කරගෙන කිසියම් ශ්‍රේෂ්ඨ අරමුණක් වෙනුවෙන් පෙනී සිටින හා සාමකාමීවත් සදාචාරාත්මකවත් සංවාද කරන, කිසියම් විශ්වාසයකින් බලා හිඳින මහත්මාවරුන් ගැන නොවේ. 
බෙරයට ගහන විට මහ හඬින් ශබ්දය නිකුත් වේ. ඇතුල හිස්‍ ය. එවැනි මාර පුත්‍රයන් රාශියක් වත්මන් දේශපාලන සන්දර්භය තුල ඔවුන් කල ලබ්බක් නැතත් උද්දාමයෙන් හා ඉතාමත් අසික්කිත ලෙස කරන රඟපෑම ගැනය. එසේම සූදානම් වී නොසිටි යන යන තැන හාන, අං දෙකක් හා නැට්ටක් විතරක් නොමැති මෝඩ දේශපාලකයින් හා උන් වෙනුවෙන් කුලල්කා ගන්නා මිනිසුන් ගැනය. 
 
දේශපාලනය අන්ධ ඇදහිල්ලක් ලෙස සලකන පුද්ගලයින් සමඟ කටයුතු කරන විට, අප ප්‍රවේශම් විය යුත්තේ එබැවිනි. ඔවුන් තණකොළ නිල් යැයි විශ්වාස කරන්නේ නම්, කිසිදු තර්කනයක් ඔස්සේ ඔබට තණකොල කොල පැහැති බව වටහා දෙන්නට නොහැකි වනු ඇත. මේ සියල්ල රැඳී ඇත්තේ මිනිසාගේ සමාජ පසුබිම, සංස්කෘතිය සහ අධ්‍යාපනය මත පදනම්වයි. දේශපාලනය ආගමක් කරගත් මිනිසුන් කොයි මොහොතේ හෝ හාස්කමක් සිදුවී තම බලාපොරොත්තු සපල වේ යැයි බලාහිඳී! 
 
රටට ආදරය කරන, රටට පක්ෂපාතී මිනිසුන් සියල්ල හාස්කමකින් සිදුවන තෙක් හෝ දේශපාලකයින්ට ඕන දේ සිදුකරන තෙක් බලා සිටින්නේ නැත.

Sunday, August 3, 2025

හේන්පිටගෙදර සිට වැලිකඩ හරහා



බන්ධනාගාර ගතව සිටි ඤාණසීහ නාහිමියන්
අධිකරණය වෙත හෝ නැවතත් බන්ධනාගාරය වෙත වැඩම කරන අවස්ථාවක්.

 

...බෞද්ධාලෝක මාවතේ පිහිටි පොලිස් පරීක්ෂණ ස්ථානයේ රාත්‍රිය ගත කර, දෙවෙනි දින මැගසින් බන්ධනාගාරයට යවනු ලැබූ මම කාමර කිහිපයක් ඇති වාට්ටුවක එක් කාමරයක නතර කරනු ලැබීමි.
පසුවදාට එළි විය. 

මා අත තිබුණේ පෑන පමණකි.

එහි පාලක නිලධාරී මහතා ජෝර්ඩන් නමැති ලංසි මහතෙකි. ඒ මහතා කාරුණික පුද්ගලයෙකි. එසේම බුද්ධි සම්පන්න ය. මම ඒ මහතාගෙන් ලියන්නට ඉඩ තිබේදැයි ඇසීමි. එයට ඉඩ ඇති බව දැනගත් පසු කරදාසි ද ලබාගෙන 'දුටුගැමුණු රජුගේ චරිතය' පාලි පද්‍යයෙන් වර්ණනාත්මකව රචනය කිරීම ආරම්භ කළෙමි. මාසයකින් එම පොත අවසන් කිරීම මගේ එකම අධිෂ්ඨානය විය. 

...ඒ ගෙතූ අවස්ථාවේ මා ළඟ කිසිම පොතක් පතක් නොවීය. දසමහ යෝධයන්ගේ චරිත දැක්විය යුතු අවස්ථාවෙහිදී ඔවුන්ගේ නම්, ගම් සහ චරිත ආදිය මට මතක නැත. ඒවා කෙසේ දැන ගත හැකි ද ? යන ප්‍රශ්නය මා සිතට නැගිණි. සිරකරුවන් සඳහා එහි පුස්තකාලයක් ද තිබේ. මම එහි ගොස් එකිනෙකාගේ අතටම දිය වූ කබල් පොත් ගොඩ අදින විට 'දසමහ යෝධයෝ' යන නමින් මුද්‍රිත කුඩා පොතක් හමුවිය. එයින් මගේ ගැටලුව ලිහී ගියේ ය.
....පරිච්ඡේද 18කින් සහ පාලි පද්‍ය 1106කින් එය මාසයක් තුළදී සම්පූර්ණ කළෙමි. එම වර්ෂයේ ශ්‍රී ලංකා සාහිත්‍ය මණ්ඩලය මගින් පාලි පද්‍ය සඳහා පිරිනමන ලද ත්‍යාග ද එම පොතට හිමිවිය.
...මගේ ජීවිත කාලය තුළ සාර්ථක, ප්‍රයෝජනවත් ජීවිතයක් ගත වූ කාලය කවර කාලයදැයි යමෙක් මගෙන් ප්‍රශ්න කළහොත් මා පිළිතුරු දෙන්නේ මැගසින් බන්ධනාගාරය තුළ මා ගත කළ අවුරුදු 03 හා මාස කිහිපය යයි කියමි. එයට හේතුව නඩුවට උසාවියට යන එන හා එහි ගෙවන කාලය හැරුණු විට හැම මොහොතක්ම ධර්ම ශාස්ත්‍රීය සේවය සඳහා මට කැප කළ හැකිවීම ය. මම එම බන්ධනාගාරය තුළ දින 1228ක් ගත කළෙමි.
...මගේ බන්ධනාගාර ජීවිතය ඉතාම සාර්ථක ජීවිතයක් බව එහිදී රචනා කළ පොත් 28න් ඔබට ද පැහැදිලි වනු ඇත.
- අපවත් වී වදාළ ශ්‍රී ලංකා රාමඤ්ඤ මහානිකායේ අධිකරණ සංඝනායක රාජකීය පණ්ඩිත හේන්පිටගෙදර ශ්‍රී ඤාණසීහ නාහිමිපාණන් වහන්සේ
අදට යෙදෙන හේන්පිටගෙදර ශ්‍රී ඤාණසීහ නාහිමියන්ගේ 44වැනි ගුණානුස්මරණය නිමිත්තෙන් උපුටාගන්නා ලද්දේ උන්වහන්සේ විසින් රචනා කරන ලද 'හේන්පිටගෙදර සිට වැලිකඩ හරහා' ස්වයං ලිඛිත චරිතාපදානයෙනි.

හසිත චාමිකර ගුණසිංහ